شيرين عبد الوهاب: حلاقة شعري دعمت محاربات السرطان

تحدثت النجمة شيرين عبد الوهاب لأول مرة عن كواليس قرارها بقص شعرها عقب انفصالها عن حسام حبيب، مؤكدة أن هذا الفعل “وراثي” لأن والدها كان يحلق شعره بالكامل بعد كل أزمة، ونصحت الجميع بعدم تقليدها، كما وجهت الشكر لجمهورها لأنه شعر “بالوجع” وقالت أن أكثر شيء خافت منه بعد قص شعرها كان ردة فعل ابنتيها هنا ومريم.

أضافت شيرين خلال حوارها مع الفنانة إسعاد يونس في برنامج “صاحبة السعادة”، على قناة dmc، احتفالا ببداية العام الجديد: كنت مرعوبة قبل أول حفل لي في الإمارات من رد فعل الجمهور على شكلي الجديد، بقيت أبص في عيون الناس مشوفتش حاجة هما منبهرين بيها غيري أنا، مش بشكلي، بسّطوا الموقف عليّ أوي.

تابعت مؤكدة إنها تلقت اتصالا من محاربات السرطان لشكرها على قص شعرها باعتباره واحدا من وسائل دعمهن، وقالت: بعد المكالمة دي قلت لنفسي أنا معنديش حاجة خالص مقارنة بالألم العظيم للمحاربات.

أشارت إلى تخوفها من اثر مظهرها الجديد على ابنتيها هنا ومريم وقالت: أول حاجة كنت خايفة منها قبل ما اطلع هي البنات وإنهم يتعقدوا ويقولوا إيه ده.. بس طلعوا عيال مكحرتين وبيفهموا ويقدّروا وأكيد مش هيقلدوا ومش عايزين حد يقلد ده.

وقالت شيرين أنها لا تنصح أي امرأة بقص شعرها، قائلة: أنا بقول أهو محدش يعمل كده.. دي وراثة أنا أبويا كده.. فمش كل ما واحدة تتخانق مع جوزها تروح تحلق شعرها وتقول له أصل بقلد شيرين!”.

وكشفت شيرين عبد الوهاب، عن أمنياتها فى العام الجديد مؤكدة أنها تتمنى عمل مسلسل وفيلم كوميدى فى 2022، مشيرة إلى أنه لابد من إظهار الجانب الآخر لها وهو الكوميديا، وأنها تتمنى أن تكتب وتنقل فكرها فى فيلم كوميدى.

وتابعت: أما المسلسل بقى أنا عاجبانى فكرة الفلاحة الفصيحة، زى سعاد حسنى فى الزوجة الثانية، لازم تبقى الشخصية اللى عاوزها كدة وبتتكلم كدة، وأنا عاوزة أقدم شيء كوميدى بأحدث طرق، وياريت تكتبيلى حاجة.

أضافت: نفسى أعمل أغنية كل شهر وكل أسبوع وكل يوم، أنا جعانة غناء، عندى أغانى كتير بس أنا أحب أن الجرعة تكون خفيفة عالناس، أنا بقيت قديمة شوية، بسأل على ردود أفعال الناس بس مش بتابع، بفتح تلفونى ثوانى فبيسحب منى شحنة، فبمقتش أتابع، ونفسى اللى جاية تكون أغنية قديمة شوية شبه بتونس بيك.

وتحدثت شيرين عن مفاجاة داخل منزلها مؤكدة إن لديها فى منزلها “عفاريت” تستضيفهم وتتعايش مهم، وقالت: الحاجة تبقى قصاد عينى كدة وفجأة تبقى مش موجودة، فببتدى أرحب بيهم وأجيبلوهم حاجة يشربوها، والحاجة تظهر على طول، وبيحبوا أدلعهم علشان الحاجة تظهر.

أضافت: أوقات أسمع حاجة بتنادينى، برد السلام وأقول أيوة حاضر أنا جاية أهو، أنا مش بخاف، ومش بروح، برد السلام عليهم بس.

هنا، ابنة الفنانة شيرين عبد الوهاب، وصفت والدتها بالقوية والطيبة، وقالت في أول ظهور إعلامي لها: إذا قمت بعمل شيء لم يعجبها، تتحدث معنا بهدوء، وبعدها تقوم بنصحى وتعطينى الفرصة، وآخر مرحلة “بتزعل مننا”.

وتابعت: ماما بتحب النظافة، ولو دخلتى فى أوضتى مش هتعرفى فين الأرض، أنا عندى فوضى منظمة فى أوضتى، وعلى طول بتفرج على نتفلكس وتيك توك.

أضافت: فى واحدة صحبتى لما بقولها تيجى بيتى، بتسألنى مامتك هتبقى هناك؟ باقى صحابى عارفين أن ماما شيرين عبد الوهاب، لكن مش بيسمعوها، وأكتر حاجة بحبها فى ماما، هو جمالها الطبيعى وليست مزيفة، وجميلة من الداخل والخارج وقوية وواثقة فى نفسها.

وتابعت: بلاقى ماما قاعدة فى الأوضة اللى جنبنا مشغلة مزيكا عالية وبتغني، هى بتغنى فى حالها مع نفسها، وأنا بسمعها أحيانا مش بسمعها دايما وبحب أسمع أغنية (خلى اللى يغيروا مننا).